Exo 4 | BJR | STEP | Mooseefa Ánutuna ufa iriséenoo kaifáa irámirinoo qinau. Misá Isaraee máqannaa sía qiní ufa qaindúsia, sía qiní ufa íria qiníara únna fee qímasee Yáaweefa sía aní áfusaa kooroo ifaná únna qiaanoo qífaqa qinee náqifee ianáuree. Náqifee íánaqee misá qiní óosana qáfee fee kúqaa fee qifáree.

Exodus 4

Ánutufa Mooseena óosana óosana kúdifaanna áuqaani féera afeeka áminau.

1 Mooseefa Ánutuna ufa iriséenoo kaifáa irámirinoo qinau. Misá Isaraee máqannaa sía qiní ufa qaindúsia, sía qiní ufa íria qiníara únna fee qímasee Yáaweefa sía aní áfusaa kooroo ifaná únna qiaanoo qífaqa qinee náqifee ianáuree. Náqifee íánaqee misá qiní óosana qáfee fee kúqaa fee qifáree. 2 Miqí qufanoo Ánutufa qinau. Aní ásaukuki anee nánee úqirafa nídanee, qufanóo Mooseefa qinau. Sáunu úqirausa nídaqee qinau. 3 Ánutufa iriséenoo qinau. Dóo miná maqásaa áqua qufanóo maqásaa áqusoofanóo mi saunúfa sakáni kambíqa fufanoo Mooseefa miná qáfamaseenoo rufíasee sandánau. 4 Ánutufa kafáa qímaminoo qinau. Aneenná ásaukunnai mara miamí ámeesa qúmaraa qufanoo qumároofanoo kafáa ásaukuki sáunù kámmafinau. 5 Miqóoqari Yáaweefa Mooseena qímaminau. Anée óoqu Isaraee máqannaa nífusaa miqínaqa misá qiníara Abarahaamána faqa Isakeena faqa Yakooboona fáqa misá Yáaweefa misá Ánutufa kúqaa aní afusaa kooroo íifoo qifáranoo.

6 Yáaweefa kafáa Mooseena qímaminau. Anée aneenná siútaki ásauku upeekáa. Miqí qufánoo Mooseefa miqímminau. Ásauku upeekáseenoo radúkusee qáfoofanóo ásaukumau aiqáma namúandáundau inóo márufanoo qáfanau. 7 Ánutufa kafáa qinau aneenná ásauku kafáa upeekáà qufanóo upeekáseenoo radúkuseenoo qáfoofanoo ásauku máu namúandáundau írafa sía marínau. Dínniara foorá kai márinau. 8 Ánutufa kafáa Mooseena qímaminoo qinau. Anée indaarú sáunù uqannífiqaina sía írifana innaaqiana ásauku uqannífiqáinaqa íriaqa. 9 Misá aní mi ainaina qandá qáfamasee sía aní ufa írifana anée Niru námmari saka qumáreenana aadána máqasaa adíàsainanoo fidíka kai mandifínaqa qáfaaqa.

10 Mooseefa Yáaweena ufa iriséenoo qímaminau. Óo Yáawee sía qiní diiqáa. Qinee óoqaindari sía ámiqimmasee faiqí nífusaa ufa qúnausa máridaqa. Maqee anée qiní qímá qímiannaqooqari sía mifa qiní maréeqee ufa qímarunausaikammá qiseenoo. Qinee sía ufa qúnausa ufara mammá qímarunausa máridaqa. 11 Miqí qufanoo Ánutufa Mooseena qímaminoo qinau. Yáfee nífauru nímidanoo fee. Yafee sía ufa qíasaika faqa náaqoo qaunírausaika faqa mánnisaidanoo fee. Yáfee nífu máqarana faqa nífu dimbarana faqa nímidanoo fee. Qinée Yáaweesa kaí miqídaqa. 12 Moosee anée doo fúa. Qinée aní ufa dadaaqi aakápaananá qinnáranoo.

13 Mooseefa kaifáa Yáaweena qímaminoo qinau. Óo Yáawee anée moó aqiqáinanoo fúani. 14 Yáaweefa miná iriséenoo áranaqoofanóo qinau. Dóo amaná aní áfasaafa Áaroonafa Reefina átikinaafa andeeqásee ufa qímarifa márifaqa qinee íridaqa. Mifá maqee aníara randánoo ánidanoo. Mifá aní paqúrimándee asasíannoo. 15 Anée miná qímaminanoo mifá misá qímannimiani. Qinée ínniqára dadaaqíanaqa ufa qímannimifaranoo. Qinée ínneeqára ifándinna áinaina qímannimianaqa áuqeefaranoo. 16 Ánutufa kafáa Mooseena qímaminau. Áaroonafa aní ufa maréeqee faiqí ánaasee qímannimíannoo. Mifá ani óora foorá márinana anée miná Ánutufara foorá máridana mifá áuqaanínna áinaina anee aakápeennáranoo. 17 Anée aneenná sáunù faqa úqirafa fúa. Minánnai óosana óosana ainaina faiqí sía amana áuqaaqaa ira áinaina áuqeennaranoo.

Mooseefa Isipa máqusai kafáa anirandée finau.

18 Mooseefa Yáaweena ufa iriséenoo narí áiraamaku Yeetaroo funnái óonureenoo qímaminoo qinau. Amanée qinée Isipa máqusai kafáa anirandée óonuree qeeqá áinaina níqafaanauree. Misá káqi fee máridee doo fee kúqia. Miqíqufanoo Yeetaroofa iriséenoo eedóo qímasee aiqanau.

19 Mooseefa Midianna máqa máaqai káqi márufanoo Ánutufa kafáa qímaminoo qinau. Dóo fíndi fínana kafáa Isipa máqusai fúà. Aní árirari marúsa dóo kúqia. 20 Mooseefa irisée eedóo qímaseenoo narí ánaaqa faqa faiqi námu faqa maréeqee doonkísaa quqáseenoo finau. Ánutufa máree fúannee qu sáununa faqa máree finau.

21 Ánutufa Mooseena qímaminoo qinau. Anée Isipa máqa máaqai óonureenana misá karaambáiqa áfusaa faiqí sía amana áuqaaqáa íra áinaina qinee ámiafanna áfeekanannoo áuqaa. Miqí márinaqa qinee Fáraoona kaukaata qíra írirana ámiananoo sía eedóo qínaqa Isaraee máqannaasa fifáranoo. 22 Anée maaqí qímaseenana Fáraoona qímamia. Yáaweefa maaqí qídanoo. Isaraee máqannaasa qiní óoqa faiqiará foorá máridammiaafoo qia. 23 Qinée aní qímamidaqa. Anée qiní óoqa faiqiuqa Isaraee máqannaasa quqásainaqa misá óonuree qiní qimooqiaqa, qúnana anee qáòo qíanaqa doo maqee aní óoqa faiqi áruanaura.

24 Mooseefa narí faiqì ánaasee faqa fídanoo eendúfanoo aanaí faiqanau. Eendáki Ánutufa aniréenoo Mooseena kuqá árirara ínau. 25 Miqufanoo Mooseena ánaaqa Sipooraa námmarifa óoni raiqárana qumáreenoo narí ámaaku afaaqa áti aukúseenoo minánnoo Mooseena áiku áuqamáseenoo maqásaa quqánau. Quqáseenoo qinau. Anee qini qifaaqi fidíka ánaaqi fasiqa máriananoo fee qinau. 26 Miqimmásoofanoo Yáaweefa Mooseena sía árinau.

27 Miqí qímarufanoo Yáaweefa Áaroona qímaminoo qinau. Anée aadána máqa máaqai fídana Mooseena paqúria. Áaroonafa eedóo qímasee Ánutuna náaquqara áaqanai óoru Mooseena paqúrinau. Paqúrimasee ámooqa nanau. 28 Ámóoqásoofanoo Mooseefa Isipa máqa máaqái fúanífeera Yáaweefa qímamuna faqa óosana óosana áinainara faqa Áaroona qímaminau. Yáaweefa faiqí sía amana áuqaaqaa íra áinaina áuqánnee quná faqa Áaroona qímaminau. 29 Mooseesa Áaroonasa Isipa máqa máaqai óoqureeqa Isaraee máqannaa faiqí firaasá náarama quqáqau. 30 Quqáseeqa Yáaweefa Mooseena qímamu ufáusa aiqáma Áaroonafa qímannimisoofanoo Mooseefa faiqí sía amana áuqaaqaa íra áinainauqa misá nífusaa áuqanau. 31 Isaraee máqannaasa Áaroona mi ufána iriséeqa kúqaa mifoo qiqau. Misá Yáaweefa misá unnai ánunara náriqa firaa aupuraranara irisée kummá rámafufaqa innaaru qiqau.